काठमाडौँ, ७ जेठ । मौसम पूर्वानुमान महाशाखाका अनुसार आज देशका विभिन्न भागमा मौसममा आंशिकदेखि साधारणतया बदली रहनेछ। कोशी, बागमती र गण्डकी प्रदेशका हिमाली तथा पहाडी भू-भागमा वर्षा र हिमपातको सम्भावना रहेको छ भने तराईका केही क्षेत्रमा अत्यधिक गर्मी हुने देखिएको छ।
दिउँसोको मौसम: पहाडमा बादल, सुदूरपश्चिम र लुम्बिनीमा टन्टलापुर घाम
- बदली: कोशी प्रदेशसहित बागमती र गण्डकी प्रदेशका हिमाली तथा पहाडी भू-भागमा साधारणतया बादल लाग्नेछ। मधेश प्रदेश, बागमती र गण्डकीको तराई तथा बाँकी प्रदेशका पहाडी क्षेत्रमा आंशिक बदली हुनेछ। अन्य तराई क्षेत्रमा मौसम सफा रहनेछ।
- वर्षा र हिमपात: कोशी, बागमती र गण्डकीका हिमाली तथा पहाडी क्षेत्रका थोरै स्थानहरूमा मध्यम वर्षा वा हिमपातको सम्भावना छ। मधेश, लुम्बिनी, कर्णालीका पहाडी क्षेत्र र बागमती, गण्डकीका तराईका एक-दुई स्थानमा पनि हल्कादेखि मध्यम वर्षा हुनसक्नेछ।
- गर्मीको चेतावनी: सुदूरपश्चिम र लुम्बिनी प्रदेशका पहाडी तथा तराई भू-भागमा आज ‘तातो दिन’ (Heat Wave) हुने सम्भावना छ।
रातीको मौसम: मेघगर्जनसहित वर्षाको सम्भावना
- बदली: राती कोशी, बागमती र गण्डकीका हिमाली र पहाडी क्षेत्रमा साधारणतया बदली नै रहनेछ। मधेश र बाँकी पहाडी क्षेत्रमा आंशिक बदली हुँदा अन्य क्षेत्र सफा रहनेछ।
- वर्षा: कोशी, बागमती र गण्डकी प्रदेशका थोरै स्थानहरूमा तथा मधेश प्रदेशका एक-दुई स्थानमा मेघगर्जन र चट्याङ्गसहित मध्यम वर्षा र हिमपातको सम्भावना रहेको छ।
मौसममा आउने यस्तो उतारचढाव र तराईमा बढ्दो गर्मीका कारण आवश्यक सतर्कता अपनाउन महाशाखाले अनुरोध गरेको छ।
