रुपन्देही, ३ वैशाख । रुपन्देही प्रहरीले २१ हजार रुपैयाँ बराबरको नक्कली नोटसहित चार जनालाई पक्राउ गरेको छ। भैरहवा र सैनामैना क्षेत्रबाट विभिन्न मितिमा पक्राउ परेका उनीहरूलाई प्रहरीले आज सार्वजनिक गरेको हो।
पक्राउ पर्नेहरूमा विष्णु श्रेष्ठ, मुक्तिप्रसाद खनाल, रोलबहादुर श्रेष्ठ र दीपेन्द्र थापा रहेका छन्। नक्कली नोटको अवैध कारोबार भइरहेको सूचनाका आधारमा खटिएको प्रहरी टोलीले उनीहरूलाई रु १,००० दरका २१ थान नक्कली नोटसहित समातेको डीएसपी कृष्णकुमार चन्दले जानकारी दिनुभयो। घटनाबारे थप कानुनी प्रक्रिया अगाडि बढाइएको प्रहरीले जनाएको छ।
