सिरहा, ३ वैशाख । सिरहाको लहान नगरपालिकामा क्रिकेट खेलको विकासका लागि ठूलो लगानीमा रङ्गशाला निर्माण कार्य सुरु भएको छ। लहान नगरपालिका–४ स्थित यज्ञभूमिमा सङ्घीय सरकार र स्थानीय सरकारको संयुक्त लगानीमा निर्माण हुन लागेको क्रिकेट रङ्गशालाको सोमबार औपचारिक शिलान्यास गरिएको हो।
नगरप्रमुख महेशप्रसाद चौधरीले एक विशेष समारोहबीच रङ्गशालाको शिलान्यास गर्नुभएको हो। नगरपालिकाको गौरवको आयोजनाका रूपमा रहेको यस रङ्गशालाले लहानलाई खेलकुदको ‘हब’ बनाउने लक्ष्य राखिएको छ।
लागत र सम्झौता
रङ्गशाला निर्माणका लागि कुल रु ८ करोड २३ लाखको लागत अनुमान गरिएको भए तापनि ठेक्का प्रक्रियामार्फत ३० प्रतिशत न्यून (बिलो) दरमा रु ५ करोड ६२ लाखमा निर्माण सम्झौता भएको छ। यस आयोजनाका लागि सङ्घीय सरकारले रु ३ करोड बजेट विनियोजन गरेको छ भने बाँकी रकम लहान नगरपालिकाले व्यहोर्नेछ।
गुणस्तरमा विशेष निगरानी
धेरै न्यून दरमा ठेक्का लागेकाले निर्माणको गुणस्तरमा प्रश्न उठ्न सक्ने भन्दै नगरपालिकाले विशेष सतर्कता अपनाएको छ। नगरपालिकाका योजना प्रमुख अनिक यादवले प्राविधिक टोलीमार्फत कडाइका साथ अनुगमन गरिने र गुणस्तरमा कुनै सम्झौता नगरिने बताउनुभयो।
खेलाडी र स्थानीयका लागि ठूलो अवसर
शिलान्यास कार्यक्रममा बोल्दै नगरप्रमुख चौधरीले भन्नुभयो, “लहानमा क्रिकेटको क्रेज लोभलाग्दो छ तर उचित मैदान नहुँदा खेलाडीहरू मारमा थिए। अबको दुई वर्षभित्र (२०८३ चैतसम्म) निर्माण सम्पन्न गर्ने लक्ष्य लिएका छौँ।”
यो रङ्गशाला निर्माण भएसँगै स्थानीय प्रतिभा प्रस्फुटन हुने मात्र नभई यसले लहानको अर्थतन्त्र र पर्यटनमा समेत सकारात्मक प्रभाव पार्ने अपेक्षा गरिएको छ।
