झापा,२३ वैशाख । जिल्ला प्रहरी कार्यालय झापाले आफ्नो नियन्त्रणमा रहेका तर हालसम्म सवारी धनी पत्ता नलागेका वेवारिसे सवारी साधनहरूको स्वामित्व दाबी गर्न सार्वजनिक आह्वान गरेको छ।
प्रहरी कार्यालयले एक सूचना जारी गर्दै ‘सरकारी सम्पत्ति तथा जिन्सी मालसामान लिलाम बिक्री सम्बन्धी कार्यविधि २०७९’ को दफा २० को उपदफा (१) बमोजिम ती सवारी साधनहरूका धनीलाई १५ दिनभित्र सम्पर्क गर्न भनेको हो। हालसम्म कसैले पनि स्वामित्व दाबी नगरेका कारण कानुन बमोजिम लिलाम प्रक्रिया अघि बढाउनुअघि यो अन्तिम मौका दिइएको प्रहरीले जनाएको छ।
कसरी हेर्ने विवरण?
प्रहरीका अनुसार वेवारिसे अवस्थामा रहेका सवारी साधनहरूको विस्तृत विवरण निम्न माध्यमबाट हेर्न सकिनेछ:
- जिल्ला प्रहरी कार्यालय झापाको फेसबुक पेज: DPO JHAPA, NEPAL
- कोशी प्रदेश प्रहरी कार्यालय विराटनगरको फेसबुक पेज
- प्रहरीले जारी गरेको सूचनामा रहेको QR कोड स्क्यान गरेर
सम्पर्क प्रक्रिया
सम्बन्धित सवारी धनीहरूले यो सूचना प्रकाशित भएको मितिले १५ (पन्ध्र) दिनभित्र आफ्ना सवारी साधनका सक्कल कागजपत्रहरू (ब्लुबुक, बिल आदि) लिएर जिल्ला प्रहरी कार्यालय झापामा उपस्थित भई स्वामित्व हकदाबी गर्नुपर्नेछ।
म्याद नाघेपछि के हुन्छ?
तोकिएको १५ दिनको समय सीमाभित्र कुनै पनि व्यक्ति वा संस्थाले आवश्यक प्रमाणसहित दाबी नगरेमा, ती सबै सवारी साधनहरूलाई ‘सरकारी सम्पत्ति तथा जिन्सी मालसामान लिलाम बिक्री सम्बन्धी कार्यविधि’ अनुसार लिलाम बिक्री गरिने व्यहोरा समेत प्रहरीले स्पष्ट पारेको छ।
