सिन्धुपाल्चोक, १९ वैशाख । सिन्धुपाल्चोकको भोटेकोशी गाउँपालिका-२, कोदारी स्थित अरनिको राजमार्गमा सडक भासिएका कारण यातायात सेवा पूर्ण रूपमा अवरुद्ध भएको छ ।
गत वैशाख १६ गते साँझ करिब ६:३० बजेको समयमा सडक भासिएपछि सुरु भएको अवरोध आज (१९ वैशाख) दिउँसो २:४२ बजेसम्म पनि कायम रहेको छ । सडक पूर्ण रूपमा क्षतिग्रस्त भएपछि चीनसँगको प्रमुख व्यापारिक नाका तातोपानीतर्फ जाने र आउने सवारी साधनहरू बीचैमा रोकिएका छन् ।
सडक विभाग र स्थानीय प्रशासनले सडक पुनः सञ्चालनका लागि प्रयास गरिरहेको भए पनि भौगोलिक कठिनाइका कारण तत्काल बाटो खुल्न सकेको छैन । लामो समयदेखि बाटो अवरुद्ध हुँदा ढुवानीका साधन र सर्वसाधारण यात्रुहरू मर्कामा परेका छन् ।
प्रहरीले उक्त खण्डमा यात्रा गर्ने तयारीमा रहेका सवारी चालक तथा यात्रीहरूलाई वैकल्पिक मार्गको बारेमा जानकारी लिएर मात्र यात्रा गर्न वा सडक नखुलेसम्म धैर्य गर्न अनुरोध गरेको छ ।
