हल्दिबारी, २९ वैशाख | झापाको हल्दिबारी गाउँपालिकाले पालिका क्षेत्रभित्र हुने बजारका अनियमितता रोक्न बजार अनुगमनलाई तीव्र बनाउने भएको छ । गाउँपालिकाले आज २९ वैशाखमा एक सार्वजनिक सूचना जारी गर्दै बजार, पसल, औषधि पसल तथा हाटबजारहरूमा भइरहेको अस्वाभाविक मूल्यवृद्धि र अखाद्य वस्तुको बिक्री वितरण नियन्त्रण गर्न कडा कदम चाल्ने जनाएको हो ।
पालिकाका अनुसार बजारमा गुणस्तरहीन वस्तु, सडेगलेका माछा–मासु तथा म्याद गुज्रिएका सामग्रीहरूको खुल्ला रूपमा बिक्री भइरहेको जनगुनासो व्यापक रूपमा आएपछि यस्तो निर्णय लिइएको हो ।
कडा कानुनी कारबाहीको चेतावनी
गाउँपालिकाले उपभोक्ता संरक्षण ऐन २०७५ र प्रचलित कानुन बमोजिम गैरकानुनी गतिविधिमा संलग्न हुने जोकोहीलाई कारबाही गर्ने चेतावनी दिएको छ । मानव स्वास्थ्यमा प्रत्यक्ष असर पर्ने गरी अखाद्य वस्तु बेच्ने वा मूल्यवृद्धि गर्नेहरूलाई कानुनी दायरामा ल्याइने सूचनामा उल्लेख छ ।
सम्बद्ध निकायसँगको संयुक्त बैठक
बजार अनुगमनलाई प्रभावकारी बनाउन आजै पशु क्वारेन्टाइन कार्यालय काँकडभिट्टा, कचनकवल र बाह्रदशी गाउँपालिकाका प्रतिनिधि, तथा सीमा सुरक्षा गुल्म हेडक्वाटर घेराबारी लगायतका सुरक्षा निकायहरूको संयुक्त बैठक समेत बसेको थियो । उक्त बैठकले संयुक्त रूपमा अनुगमन कार्यलाई अगाडि बढाउने निर्णय गरेको छ ।
व्यवसायीलाई आग्रह
गाउँपालिकाले सबै व्यवसायीहरूलाई आफ्नो व्यवसायसँग सम्बन्धित कागजातहरू अद्यावधिक राख्न र अनुगमनको क्रममा खटिने टोलीलाई सहयोग गर्न अनुरोध गरेको छ । साथै, कतै गैरकानुनी कार्य भएको पाइएमा नजिकको प्रहरी चौकी, वडा कार्यालय वा गाउँपालिकामा खबर गर्न आम नागरिकहरूलाई समेत अपिल गरिएको छ ।
प्रमुख प्रशासकीय अधिकृत मान बहादुर वन (महेन्द्र) द्वारा हस्ताक्षरित सूचनामा अनुगमनका क्रममा कैफियत भेटिएमा प्रचलित कानुन अनुसार कारबाही हुने व्यहोरा समेत स्पष्ट पारिएको छ ।
