काठमाडौं, ३० वैशाख । राष्ट्रिय परीक्षा बोर्ड (NEB) ले माध्यमिक शिक्षा परीक्षा (SEE) का विद्यार्थीहरूका लागि परीक्षा आवेदन सम्बन्धी एक महत्त्वपूर्ण स्पष्टीकरण जारी गरेको छ। बोर्डले परीक्षामा सहभागी हुन पाउने समयावधि र रजिष्ट्रेसन नम्बरका आधारमा विद्यार्थीहरूको अन्योलता हटाएको हो।
बोर्डका अनुसार, रजिष्ट्रेसन नम्बरको सुरुको दुई अङ्क ‘८०’ भएका (एसईई २०८० ब्याचका) विद्यार्थीहरूले आगामी २०८३ साल चैत महिनामा सञ्चालन हुने एसईई परीक्षामा अन्तिम पटकका लागि आंशिक (पार्सियल) परीक्षार्थीका रूपमा सहभागी हुन पाउनेछन्।
यसैगरी, रजिष्ट्रेसन नम्बरको सुरुको दुई अङ्क ‘८२’ भएका विद्यार्थीहरूका लागि भने आगामी २०८३ असार १ गतेदेखि मौका (पूरक) परीक्षा सञ्चालन हुने भएको छ। ‘८२’ नम्बर भएका परीक्षार्थीहरूले आवश्यक परेमा आफ्नो ‘एनजी’ (Not Graded) आएका सबै विषयहरूको परीक्षा सोही मौका परीक्षामा दिन सक्ने व्यवस्था बोर्डले गरेको छ।
लामो समयदेखि परीक्षा दिन पाउने वा नपाउने भन्ने दुविधामा रहेका विद्यार्थीहरूलाई लक्षित गर्दै राष्ट्रिय परीक्षा बोर्डले यो आधिकारिक जानकारी सार्वजनिक गरेको हो। थप विस्तृत विवरणका लागि विद्यार्थी तथा अभिभावकहरूले राष्ट्रिय परीक्षा बोर्डको आधिकारिक वेबसाइट हेर्न सक्नेछन्।
