काठमाडौँ, ११ वैशाख | स्वास्थ्य बीमा बोर्डले बीमितहरूको सहजताका लागि डिजिटल माध्यमबाट सेवा उपलब्ध गराउने व्यवस्थालाई अनिवार्य बनाएको छ। बोर्डले सबै सेवा प्रदायक स्वास्थ्य संस्थाहरूलाई पत्राचार गर्दै Nagarik App वा HIB Profile मा रहेको ‘डिजिटल कार्ड’ मार्फत सेवा दिन निर्देशन दिएको हो।
किन आवश्यक पर्यो यो व्यवस्था?
धेरै बीमितहरूले भौतिक परिचयपत्र (बीमा कार्ड) हराएको वा साथमा नभएको अवस्थामा स्वास्थ्य सेवा पाउन कठिन भएको गुनासो गरेपछि बोर्डले यो कदम चालेको हो। यसअघि २०८० फागुन २४ गतेको बोर्ड बैठकले नै QR Code Scan गरी सेवा दिने निर्णय गरे पनि कतिपय अस्पतालहरूले डिजिटल कार्ड स्वीकार नगरेको गुनासो प्राप्त भएपछि बोर्डले अहिले यसलाई अनिवार्य गरेको छ।
बीमितलाई के फाइदा?
- कार्ड बोक्नुपर्ने बाध्यता हट्यो: अब बीमितले आफ्नो मोबाइलमा रहेको नागरिक एप (Nagarik App) वा स्वास्थ्य बीमा बोर्डको प्रोफाईल (HIB Profile) देखाएरै अस्पतालको सेवा लिन सक्नेछन्।
- तत्काल सेवा: कार्ड हराए पनि वा घरमै छुटे पनि उपचारमा बाधा पुग्ने छैन।
- प्रविधिमैत्री सेवा: QR Code स्क्यानमार्फत विवरणहरू रुजु हुने भएकाले प्रक्रिया छिटो र पारदर्शी हुनेछ।
अस्पतालहरूलाई निर्देशन
स्वास्थ्य बीमा बोर्डका वरिष्ठ मेडिकल सुपरिटेन्डेन्ट डा. पवन कुमार साहद्वारा जारी परिपत्रमा, अब उप्रान्त डिजिटल कार्ड मार्फत सेवा प्रदान नगर्ने स्वास्थ्य संस्थाहरूमाथि गुनासो आएमा त्यसलाई गम्भीरतापूर्वक लिइने उल्लेख छ। बोर्डले सबै सेवा प्रदायकहरूलाई यो व्यवस्थालाई अनिवार्य कार्यान्वयन गर्न/गराउन कडा निर्देशन दिएको छ।
